S'ensuyt l'amant rendu cordelier a l'observance d'amours

cordelier a l'observance

d'amours

Au son d'un bastouer cliquant

D'une tresbelle chamberiere

Sa voix singlant et decliquant

Ainsy que une seraine clere

En ung pré joingnant la riviere

M'endormis si soudainement

Que perdis propos et lumiere

Et ne sçay que devins vraiement

Sy me sembla q'un grant boullon

D'eaue me ravit et surmonta

puis survint ung estourbillon

De vent qui se doux chant m'osta

Et d'illec sy me transporta

Aussy viste comme ung canon

A ung grant boys ou m'emporta

Maugré moy voulsisse ou non

Le boys ou forest s'appelloit

La forest de desesperance

Ou jamais homme sy n'alloit

Qui ne fust marry a oultrance

Mains vaillans les fers de leur lance

y ont en combatant laissés

Mains amoureux en desplaisance

Par couroux y sont trespassés

En maintes foretz ay esté

Mais oncques n'en veis l'apareil

Car soit en yver ou esté

L'on n'y voit luire le soleil

Le temps n'y est pers ne vermeil

Tousjours y fait obscur et noir

Ne n'a que tristesse et que dueil

S'estoit verdier de desespoir

Quant je me veis en ce dangier

Lors je commencé a crier

Vers amours pour me solaiger

Et obvier au fourvoier

Priant qu'il me voulsist convoier

A ce perilleux damne pas

Car sans son secour envoier

Seur estoie de passer le pas

Sy n'euz pas mon oraison faicte

Qu'amours de sa grace et bonté

Sy me transmist une saiecte

Ardant et plaine de clarté

Qui me mist au chemin hanté

Dont de loing veis une chapelle

Vers laquelle me transporté

Jamais n'en eschapé plus belle

Ainsy pour amours mercier

Vers ceste eglise hastivement

Prins pays sans me soucier

Comme delivré de tourment

Et cheminay sy longuement

Que j'arrivay devant la porte

Qui estoit de grant exaussement

Et d'ouvraige de mainte sorte

Ceste eglise faicte a pilliers

De merveilleuse magnificence

Fondee estoit de cordeliers

Religieux de l'observance

Ayans renoncé l'aliance

Du noble service d'amours

Pour faire leens penitance

Jusques a la fin de leurs jours

Or sur ce point est a noter

Que de tous vivans langoureux

L'on eust leens souffert bouter

Sy non les loyaux doloreux

Les despourveux adventureux

Les desolés et espanis

Mesmement povres amoureux

Qui de leurs dames sont banis

De la nef du cueur du portal

Ne sauroye au long toucher

Tous les murs estoient de cristal

Tous lambroussez jusques au clochier

De fin or et d'azur mout chier

Et la croisee toute d'ivire

Brief qui vouldroit tout espluchier

Il faudroit ung jour a le dire

Sy veis en entrant a l'eglise

Ung povre amant plourer sy fort

Portant le noir et sans devise

Comme tout plain de desconfort

Triste estoit lors jusques a la mort

Com s'il vouloit pencer de l'ame

Et disoit l'en leens qu'atort

L'on l'avoit bany de sa dame

Le gallant avoit pour habit

Longue robe noire dessainte

Comme pour estre a ung obit

Cornette de beau veloux tainte

En couleur de reffus et plainte

Cheveulx longs du temps des apostres

Et puis par devocion sainte

Portoit les belles patenostres

Quant je me fus agenoullé

Et que euz commencé ma priere

De cet homme me esmerveillé

Qui menoit sy piteuse chiere

Car a ung lieu n'arestoit guere

Ains alloit tousjours et venoit

Et sembloit bien a sa maniere

Que du monde ne luy challoit

En me pourmenant de travers

De la nef et a l'opposite

Ung des religieux convers

Vint donner a tous l'eau beniste

Puis que la grant messe fut dicte

Je veis la venir damp procureur

Portant ung visage d'ermite

Qui fist a l'amant grant honneur

Or ça dist il j'ay parlé

Au jour duy de vostre matiere

Mais damp prieur s'en est allé

Sy près il n'arrestera gueres

Je vous asseure qui n'y a frere

Ceans qui ne vous aime bien

Pour quoy devés faire grant chiere

Car vostre besongne ira bien

Lors dist l'amant la leur mercy

De mon cas sont mal informés

Las je n'ay fait ailleurs ne sy

Chose dont doye d'eux estre amez

Mes biens fais sy sont clers semez

De moy ne leur en doibt challoir

Quant les auroy acoustumés

Je n'emporray que mieulx valloir