Livre Premier.

§ 1. Premierement, pour mieus entrer en le matère

et hystore dessus ditte, voirs est que, apriès l'apaisement

des guerres de Flandres qui furent si grandes,

et dont tant de vaillant homme furent mort à

Courtrai et ailleurs, et que li biaus rois Phelippes eut 5

mariet sa fille en Engleterre au roy Edouwart, li quelz

rois d'Engleterre ne fu mies de si grant sens ne de si

grant proèce plains comme avoit esté li bons rois

Edouwars ses pères, qui tant eut à faire as Danois et

as Escos et les desconfi par pluiseurs fois en bataille, 10

et ne peurent onques avoir victore à lui; et quant

il fu trespassés, ses filz de son premier mariage, qui

fu pères au roy Edouwart sur qui ceste hystore est

ordenée, pas ne le ressambla de sens ne de proèce.

Car, assés tost apriès çou qu'il fu couronnés, li rois 15

Robers de Brus, qui estoit rois d'Escoce, et qui par

pluiseurs fois avoit moult donnet à faire au bon roy

Edouwart, chevauça tantost efforciement sur lui et

reconquist toute Escoce et la bonne cité de Bervich,

et ardi et gasta grant partie dou royaume d'Engleterre 20

bien quatre journées ou cinq par dedens le pays,

et desconfi celi roy et tous les barons d'Engleterre en

une place en Escoce que on dist Struvelin, par bataille

rengie et arrestée. Et dura la cace de ceste desconfiture

par deus jours et par deus nuis. Et s'en

afui li rois englés à moult peu de ses gens jusques à

Londres. Mès, pour ce que ce n'est mies de nostre 5

matère, je m'en tairai à tant.

§ 2. Chilz rois englès, dont je parloie maintenant,

qui reçut ce grant damage en Escoce, avoit deus

frères de remariage. Si fu li uns nommés li contes

Mareschaus et fu de diverse et de sauvage manière; 10

li autres fu appellés messires Aymes et estoit contes

de Kent, moult preudons, douls et debonnaires et

moult amés des bonnes gens. Chils rois eut de madame

sa femme, fille au biau roy Phelippe, deus filz

et deus filles. Des quelz filz li ainsnés eut nom Edouwars, 15

et fu rois d'Engleterre par l'acort de tous les

barons très le vivant son père, si com vous orés avant

en ce livre. Li secons des filz eut nom Jehans de

Eltem et morut jones. Li ainsnée des deus filles eut

nom Ysabel et fu mariée au jone roy David d'Escoce, 20

filz au roi Robert de Brus. Et li fu donnée en mariage

de jonèce par l'acord de[s] deus royaumes d'Engleterre

et d'Escoce et par pais faisant. Li autre fille fu

mariée au duch de Guerle. Chilz eurent deus filz et

deus filles, Renault et Edowart; et les filles, li une 25

fu contesse de Blois de par monsigneur Jehan de

Blois son mari, et li aultre duçoise de Jullers.

§ 3. Li biaus rois Phelippes de France eut trois filz

avoech ceste belle fille ma dame Ysabel qui fu royne

d'Engleterre. Et furent cil troi fil moult bel et grant 30

chevalier. Si eut à nom li ainnés Loeis, et fu au vivant

dou roy son père rois de Navare, et l'appella

on le roy Hustin. Li secons eut à nom Phelippes li

Biaus, et li tiers Charles. Et furent tout troi roi de

France apriès le mort dou roy Phelippe, leur père, 5

par droite succession, li uns apriès l'autre, sans avoir

hoir marles de leurs corps engendrés par voie de mariage:

si ques, apriès la mort del daarrain roy Charle,

li douze per et li baron de France ne donnèrent

point le royaume à le sereur qui estoit royne d'Engleterre, 10

par tant qu'i[l] [3] voloient dire et maintenir,

encores voelent, que li royaumes de France est bien

si nobles que il ne doit mies aler ne descendre à fumelle

ne par consequense à fil de fumelle. Car, ensi

comme il voelent dire et maintenir, li filz de fumelle 15

ne poet avoir droit ne succession de par sa mère,

venant là où sa mère n'a point de droit: si ques,

par ces raisons, li douze per et li baron de France

donnèrent, de commun acort [le royaume de France] [4],

à monsigneur Phelippe de Valois, fil jadis à monsigneur 20

Charle le conte de Valois, frères à che biau

roy Phelippe deseure dit, et en ostèrent le royne

d'Engleterre et son fil qui estoit hoirs marles et neveus

au roy Charlon, et li rois Phelippes n'estoit que

cousins germains. C'est li poins par quoi les guerres, 25

les pestilenses et les tribulations sont de puis incourutes

et eslevées, et li grant meschief avenu par le

cause dou calenge et de le deffense, si com il vous

sera recordé chi apriès, quant tamps et lieus venront

que j'en deverai parler. Mais je m'en tairai encores

un petit et me retrairai à le droite matère des Englès,

si com je l'ay commencie.

§ 4. Il est bien voirs que cils roys d'Engleterre, 5

pères à ce roy Edouwart sur qui nostre matère est

fondée, gouvrena moult diversement son royaume et

fist pluiseurs diverses justices et pluiseurs merveilles

par le conseil et enhort de monsigneur Huon, c'on

dist le Despensier, qui avoit esté nouris avoecques 10

lui d'enfance. Et avoient tant fait cilz messires Hues

et messires Hues ses pères qu'il estoient li plus grant

baron d'Engleterre, en tant que de mise et de rikèce.

Et par especial messires li filz avoit si mené le roy et

si atrait à ses oppinions que sans lui n'estoit riens 15

fait, et par lui estoit tout fait, et le creoit li rois plus

que tout le monde. Et voloient li doi signeur Despensier

mestriier et sormonter tous les signeurs et

les barons d'Engleterre. Pour quoi, avinrent de puis

ou pays et à yaus meismes moult de maulz et de 20

tourmens.

Car, apriès la grande desconfiture de Struvelin, là

où li rois Robers de Brus, rois d'Escoce, avoit desconfi

che roi d'Engleterre et toutes ses gens, si com

ci dessus est dit, grant hayne et grant murmure

monteplia ou pays d'Engleterre entre les nobles barons 25

et le conseil le roy meismement encontre le

dit monsigneur Huon le Despensier. Et li mettoient

sus que par son conseil il avoient esté desconfi et

que, par tant qu'il estoit favourables au roi d'Escoce, 30

il avoit tant conseilliet et tenu le roi d'Engleterre en

negligense que li Escot avoient reconquis le bonne

cité de Bervich et ars quatre journées ou cinq par

deus fois dedens leur pays, et yaus desconfis en bataille

et mis en cace, et porté très grant damage. Et

sus ce li dit baron d'Engleterre eurent pluiseurs fois 5

parlement ensamble pour aviser et regarder qu'il en

poroient faire; des quelz li contes Thumas de La[n]castre

estoit chiés et souverains. Et li desplaisoit li

usages que li rois avoit empris, et en parla par deus

ou par trois fois assés ouvertement au dit Despensier. 10

Or, se perchut li dis messires Hues comment

on murmuroit sur lui et sus son afaire. Si, se doubta

trop fort que maulz ne l'en venist, ensi qu'il fist;

mès che ne fu mies si trestos. Ançois eut il fait moult

de coses damagables ou pays, si com vous orés chi 15

après.

§ 5. Cilz qui estoit bien dou roy, et si proçains qu'il

voloit, et plus creus tous seus que tous li mondes,

s'en vint au roy et li dist que cil signeur avoient fait

alliance encontre lui, et qu'il le metteroient hors de 20

son royaume, se il ne s'en prendoit garde. Tant fist,

par son enhort et par son soubtil pourcach, que li

rois fist à un jour prendre tous ces signeurs à un parlement

là où il estoient assamblé, et en fist decoler

sans delay et sans cognissance de raison jusques à 25

vingt et deus des plus grans barons d'Engleterre, et

tout premiers le conte Thumas de Lancastre, qui estoit

ses oncles, preudons et sains homs, et fist puis

moult de biaus miracles ou lieu où il fu decolés.

Pour le quel fait, li dis messires Hues acquist grant 30

hayne de tout le pays, et par especial de la royne

d'Engleterre et dou conte de Kent, qui estoit frères

au dit roy.

Encores ne se cessa pas li dis messires Hues de

enhorter le roi mal à faire. Car, quant il perchut

qu'il estoit mal de le royne et dou conte de Kent, il 5

mist si grant descort entre le roy et le royne, par

son malisce, que li rois ne voloit point venir en lieu

où elle fust, et dura cilz descors assés longement. Et

fu qui dist à le royne et au conte de Kent tout secretement,

pour les perilz eschiewer où il estoient par 10

le fait dou Despensier, que, se il demoroient longement

ens ou pays, li rois, par hastieu conseil et male

information, leur feroit souffrir dou corps haschière,

si com cil avoient entendu.

Dont, quant il avint que la royne et li contes de 15

Kent oïrent ces nouvelles, si se doubtèrent, car il

sentoient le roy hastieu et de diverse manière et che

messire Hue si bien de lui qu'il faisoit tout ce qu'il

voloit, sans avis et sans regart de nulle raison. Si s'avisèrent

la ditte dame et li contes de Kent qu'il se 20

partiroient d'Engleterre et s'en iroient en France veoir

le roi Charlon que la royne, qui sa sereur germainne

estoit, n'avoit veu de puis que elle fu envoiie en Engleterre;

et en menroit avoecques lui son jone fil

Edouwart, et lairoit couvenir ce roy et le Despensier 25

au sourplus. Espoir, hastement s'amenderoit leurs

estas, et y pourveroit Diex de remède et de conseil.

Ce pourpos tinrent la dame et li contes de Kent

et ordonnèrent leurs besongnes secretement et envoiièrent

devant le plus grant partie de leur arroi 30

par le rivière de Tamise en nefs en Flandres. Et

prist la ditte dame excusance de venir en pelerinage

à Nostre Dame de Boulongne. Et se parti, si com

vous poés oïr, d'Engleterre à petite mesnie, son jone

fil avoech lui, le conte de Kent son serourge et monsigneur

Rogier de Mortemer. Et montèrent à Douvres

et arrivèrent à Boulongne. 5

§ 6. Quant la royne d'Engleterre fu arrivée à Boulongne

et toute se route, elle regratia Nostre Signeur

et s'en vint tout à piet jusques à l'eglise Nostre Dame

en devotion, et fist sen offrande et sen orison devant

l'image. Li abbes de laiens et tout li monne le recuellièrent 10

liement; et fu laiens herbergie et toute se

mesnie; et s'i reposèrent et rafrescirent par cinq

jours. Au sizime, il montèrent tout as chevaus et sus

hagenées qu'il avoient amené d'Engleterre, et se partirent

de Boulongne o tout leur arroi. Si fu la dame 15

aconvoiie et acompagnie d'aucuns chevaliers de là

environ, qui l'estoient venu veoir et festiier, pour la

cause de ce que elle estoit soer au roy leur signeur.

Tant esploita la dame par ses journées que elle approça

Amiens. Chil de la cité vinrent contre lui moult 20

reveramment. Et par tout où elle passoit, as cités et

as bonnes villes, on li faisoit feste et honneur, car li

rois Charles l'avoit ensi ordonné, qui estoit enfourmés

de sa venue.

Et tant chevauça la ditte dame que elle vint à Paris. 25

Si estoient jà issut contre lui moult de noble

gent, pour le recueillier et son jone fil. Et les amenèrent

jusques au palais messires Robers d'Artois, li

contes de Dammartin, li sires de Couci, li sires de

Montmorensi et pluiseur aultre. Si descendirent devant 30

le perron et montèrent les degrés dou palais,

chil signeur François devant qui menoient la dame,

son fil et le conte de Kent; et vinrent jusques au roi

qui se tenoit en une cambre, bien acompagniés de

prelas et de chevaliers.

Quant li rois de France vei sa serour qu'i[l] en grant 5

tamps n'avoit veu [5], et elle deut entrer en la cambre,

il vint contre lui et le prist par le main droite et le

baisa et dist: «A bien vigne ma belle suer et mes

biaus niés!» Si les tint tous deus et les mena avant.

La dame, qui pas n'avoit trop grant joie fors de ce 10

que elle se trouvoit dalés le roy son frère, s'estoit jà

volue agenoullier par deus ou par trois fois, mais li

rois ne le laioit et le tenoit toutdis par le main droite,

et li demandoit moult doucement de son estat et de

son afaire. Et la dame l'en respondoit très sagement, 15

et tant furent les parolles que elle dist: «Monsigneur,

se nous va moy et mon fil assés petitement.

Car li rois d'Engleterre, mes maris, m'a pris en trop

grant hayne, et se ne scet pour quoi, fors par l'enhort

d'un chevalier englès qui s'appelle Hues li Despensiers. 20

Chilz chevaliers a telement atrait le roi à ses

volentés que tout ce qu'il voet dire et faire il est. Et

jà ont comparet pluiseur haut baron d'Engleterre sa

mauvesté, car il en fist sus un jour prendre au commandement

dou roy et en fist decoler jusques à 25

vingt et deus sans loy et sans cause, et par especial le

bon conte Thumas de Lancastre, dont ce fu trop

grans damages, car il estoit preudons et loyaus et

plains de bon conseil. Et n'est nulz en Engleterre,

tant soit nobles ne de grant afaire, qui l'ose couroucier 30

ne desdire de cose que il voelle faire. Et m'a telement

tourblet devers le roy, et le conte de Kent

men frère, que veci qu'il nous fu dit en grant amisté

par chiaus qui savoient aucunes coses dou conseil ce

dit chevalier, que nous estions en grant peril de nos 5

vies. Si nous sommes parti en grant doubtance et

venu par deça vous veoir, que je desiroie moult.»

Et li rois dist: «Ma belle suer, grant merchis.»

§ 7. Quant li rois Charles eut oy et entendu les

complaintes de sa suer, et comment elle estoit demenée 10

par le fait dou Despensier, si en eut grant pité et

le reconforta moult doucement et li dist: «Ma belle

suer, vous demorrés dalés nous; si ne vous esbahissiés

ne desconfortés de riens: nous avons assés pour

nous et pour vous. Et si meterons remède et conseil 15

à vos besongnes.» Et la dame s'agenoulla et dist:

«Monsigneur, grans mercis!» De puis la venue de

la dame, de son fil et dou conte de Kent, et que li

rois Charles eut recueilliet moult liement les dessus

dis, il se tinrent à Paris dalés le roy. Et leur faisoit 20

li dis rois faire leur delivrance de toutes coses; et estoit

souvent la royne d'Engleterre avoech le roy son

frère et la royne de France, et ooit à le fois des nouvelles

d'Engleterre qui pas trop plaisans ne li estoient.

25

Car, cilz messires Hues li Despensiers croissoit tous

jours en poissance et en amour devers le roy. Et

avoit telement attret et atournet le dit roy que tous

li pays s'en esmervilloit; et n'avoit nulz que faire en

le court dou roy, se il n'estoit de son acord. Si fist 30

il de puis moult de diversetés et de cruaultés as pluiseurs

en Engleterre, dont il estoit moult hays. Mais

nulz ne li osoit dire ne moustrer, car se il se doubtast

de qui que fust, conte ou baron, tantost il le fesist,

sus l'ombre dou roy, prendre et decoler sans nule

remède. Si estoit si doubtés, et des pluiseurs tant 5

hays, que merveilles. Et regardèrent aucun baron et

sage homme dou pays que ce ne faisoit mies à souffrir,

et que ses outrages et mauvaistés il ne poroient

plus porter. Si se traisent tout secretement ensamble

à conseil, et eurent avis et volenté que il remanderoient 10

leur dame la royne d'Engleterre, qui jà avoit

demoret en France bien priès par l'espasse de trois

ans, et tout dis dedens le cité de Paris. Se li escrisirent

et segnefiièrent, se elle pooit trouver voie ou

sens par quoi elle peuist avoir aucune compagnie de 15

gens d'armes de mil armeures de fier ou là environ,

et elle vosist ramener son fil et toute se compagnie

ou royaume d'Engleterre, il trairoient tantost vers

lui et obeiroient à lui et à son fil comme à leur

signeur, car il ne pooient ne voloient plus porter les 20

desrois ne les fais que li rois faisoit ou pays, par le

conseil monsigneur Huon, et de chiaus qui de son

accort estoient.

Quant la royne entendi ces nouvelles, elle s'en

consilla secretement au roy Charle, son frère, qui 25

bien volentiers l'entendi, et li respondi adonc que

elle l'entrepresist hardiement, car il li aideroit et li

presteroit de ses gens telz que elle vorroit avoir. Et

avoech che il li presteroit de son or et de son argent

ce qu'il l'en besongneroit. Sour ce, la royne se parti 30

de lui, et s'en revint à son hostel et se pourvei si

com elle peut. Et pria secretement des plus grans

barons de France ceulz dont elle se fioit le plus, et

qui le plus volentrieu estoient pour tel afaire, et en

pensoit estre bien certainne. Puis le fist ensi à savoir

secretement à ces barons d'Engleterre qui avoient

vers lui envoiiet. 5

Mais on ne le peut si celer que li dis messires

Hues li Despensiers ne le sceuist. Si fist puis tant, le

terme perdant, par ses messages et par dons et prommesses,

que li rois Charles de France fu si enhortés

par son conseil que il manda sa sereur la ditte royne 10

Ysabiel, qui se tenoit à son hostel entre ses gens, et

li desconsilla et deffendi si haut et si acertes qu'il

peut, que elle demorast quoie et se relaiast de ce que

elle avoit empris. Et quant la dame entendi le roy

son frère, elle fu toute esbahie et abaubie, ce ne fu 15

point de merveilles. Si perchut bien que ses frères

estoit mal infourmés, car riens que elle peuwist dire

à l'encontre ne li pooit valoir ne aidier. Si se parti

adonc de lui moult triste et esmarie, et revint arrière

à son hostel, et ne se relaia point pour ce à appareillier. 20

Li rois ses frères le sceut; s'en fu courouciés,

quant sus sa deffense elle voloit ouvrer. Si fist,

par le conseil qu'il eut, commander, sus corps et sus

avoir, que nulz de son royaume ne se meuist, ne

alast avoech la ditte royne, sa suer.

25

Quant la dame seut ce, elle fu assés plus triste que

devant, ce fu bien raisons. Si ne sceut que faire ne

que penser, car toutes ses besongnes li venoient au

contraire, et estoient venues de lonch tamps. Et se

li falloit, ce li sambloit, par mauvais conseil, cilz qui 30

mieus li devoit aidier à son besoing. Et si approçoit

li termes que elle avoit mandet à chiaus que elle tenoit

pour ses amis en Engleterre. Si demora moult

esgarée, sans nul confort, comme celle qui ne savoit

que elle peuist faire ne que devenir. Et requeroit

souvent Dieu estroitement en soi meismes, et li prioit

que il le vosist aidier et consillier. 5

§ 8. Ne demora pas gaires de temps que on li dist,

fiablement et par grant bien, que, se elle ne se gardoit

sagement, li rois, ses frères, le feroit prendre et

mener en Engleterre, pour relivrer à son mari, le roi

d'Engleterre, et detenroit son fil avoecques lui, car il 10

ne li plaisoit plus que elle eslongast ensi son mari.

De ces nouvelles fu la dame plus esbahie que devant,

car elle amast mieus estre morte et desmembrée que

venir ou pooir ne ou dangier son mari ne le Despensier.

Si eut bien mestier d'avoir bon conseil. Si 15

s'avisa que elle vuideroit France et s'en avaleroit en

Haynau, pour veoir le conte et monsigneur Jehan de

Haynau son frère, qui estoient signeur plain de toute

honneur et de grant recommendation. Espoir, trouveroit

elle en yaus tout confort et bonne adrèce, et 20

si estoit lor cousine moult proçainne.

Si ordonna la ditte dame ses besongnes, et fist ses

gens sages de son departement, et comptèrent et

paiièrent par tout. Adonc, se parti au plus tost et au

plus quoiement que elle peut de son hostel, avoech 25

li ses filz en l'eage de quinze ans ou environ, li contes

de Kent, li sires de Mortemer, et tout li aultre

chevalier d'Engleterre, qui estoient afuioit apriès lui.

Et fist tant par ses journées que elle passa France,

Vermendois et Cambresis, et vint en Ostrevant, en 30

Haynau, en un chastiel que on appelle Buignicourt,

dont messires Nicoles d'Aubrecicourt estoit sires. Et

li quelz bachelers et sa femme rechurent liement et

bellement en leur hostel la ditte royne d'Engleterre

et son fil et leurs gens; et trouvèrent apparilliet tous

les biens de laiens. 5

Ces nouvelles furent tost venues à Valencienes, où

li contes de Haynau et messires Jehans de Haynau

ses frères estoient, que la royne d'Engleterre estoit

herbergie à Buignicourt chiés le chevalier. Et quant

li doi signeur dessus dit oïrent ce, si furent tantost 10

consilliet quel cose il en apertenoit à faire. Premierement,

messires Jehans de Haynau se parti de Valenchiènes,

li moult bien acompagniés de chevalier

et d'escuiers, et chevauça tant qu'il vint à Buignicourt,

en Ostrevant, et trouva la dessus ditte dame, 15

à qui il fist toute l'onneur et reverense qu'il peut, car

bien le savoit faire. La dame, qui estoit moult triste

et esgarée, et en sus de tous consaulz, fors de Dieu

et de lui, commença à complaindre au dit signeur

de Byaumont, en plorant moult piteusement, ses besongnes, 20

et recorder ses dures avenues, de cief en

cor, tout ensi que avenu li estoit jusques à ores:

premierement, comment elle estoit dechacie d'Engleterre,

et ses filz, et venue en France sus le fiance de

son frère le roy; et comment elle cuidoit [estre] [6] 25

pourveue de gens d'armes par le conseil de son frère,

pour aler plus poissamment et en mener son fil en

son royaume, si com si ami d'Engleterre li avoient

mandet; et comment ses frères, puissedi, fu telement

conseilliés qu'il avoit brisiet tout ce voiage et 30

deffendu à tous gentilz hommes que nulz ne se mesist

avoech lui, sus à perdre leurs terres et le royaume.

Et li compta comment, et à quel mescief, elle

estoit là afuie à tout son fil, comme celle qui ne savoit

à cui ne en quel pays trouver confort ne soustenance. 5

§ 9. Et quant li gentils chevaliers messires Jehans

de Haynau eut oy la dame complaindre si tenrement,

et que toute fondoit en larmes et en plours, si en

eut grant pité et li dist, pour lui reconforter, moult 10

doucement: «Certes, dame, veés ci vostre chevalier

qui ne vous faurront pour morir, se tous li mondes

vous falloit. Ains, ferai tout mon pooir de vous

et de vostre fil conduire, et de vous et de lui remettre

en vostre estat en Engleterre, en l'ayde de vos 15

amis qui delà le mer sont, ensi que vous dittes. Et

je, et tout cil que je porai priier, y enventurrons les

vies, ançois que vous ne soiiés au dessus de vos besongnes.»

Et quant la dame l'eut oy parler une si haute et 20

si noble parolle, et si reconfortans ses besongnes,

elle qui seoit, et messires Jehans de Haynau devant

lui, se dreça en estant et se volt engenoullier, de le

grant joie et de le grasce qu'il li offroit; mès li gentilz

chevaliers ne l'euist jamais souffert; ains se leva 25

moult apertement, et prist la dame entre ses bras et

dist: «Ne place jà à Dieu que la royne d'Engleterre

face ce, ne ait empenset à faire, que de li engenillier

devant son chevalier! Mais, dame, reconfortés

vous, et vostre gent ossi, car je vous tenrai vo prommesse. 30

Vous venrés veoir monsigneur mon frère et

ma dame ma suer, vostre cousine, la contesse de

Haynau, qui vous en prient; et en sui cargiés de

vous dire, et de vous mener par devers yaus.» Et la

dame li ottrie et dist: «Certes, sire, je trueve en

vous plus de confort et d'amour que en tout le 5

monde. Et, de ce que vous me dittes et offrés, cinq

cens mille mercis. Jamais ne l'arons desservi moy ne

mes filz; mès, se li tamps vient que nous soions en

nostre estat, si com jou espoire bien, par le confort

et grasce de Dieu et de vous, il vous sera grandement 10

remuneret.»

Assés tost apriès ces parolles, prist li sires de

Byaumont congiet de la ditte dame, de son fil et

dou conte de Kent et des autres chevaliers, et s'en

vint ce soir herbergier à Denaing. Et la royne demora 15

à Buignicourt, grandement reconfortée, et bien

y avoit raison, en le pourveance de monsigneur Nicole

d'Aubrecicourt, qui en faisoit ce qu'il pooit. Et

tant en fist que la royne l'en sceut grant gré. Et demora

tous jours de puis ses chevaliers, et si enfant 20

et leur generation ossi, si com vous orés recorder en

avant en ceste hystore.

§ 10. Quant ce vint au matin, apriès messe et boire,

messires Jehans de Haynau se parti de Denaing, et

chevauça de rechief à Buignicourt; si trouva que la 25

royne estoit jà toute apparillie et ses gens ossi. Si se

partirent tout ensamble, et ses filz et leur route, ou

conduit le signeur de Byaumont, qui les amena

adonc à Valenciennes. Et y furent liement et bellement

rechut; et estoit la Salle dou Conte toute appareillie 30

pour la ditte dame et ses gens. Car, à ce donc,

li contes se logoit en l'ostel de Hollandes, et tous ses

hosteulz. Si descendi la royne d'Engleterre à le Salle,

et y fu logie et herbergie bien et aisiement. Et le

vint là veoir la contesse de Haynau, qui li fist toute

honneur et reverense, car bien le savoit faire. Et 5

ossi fist li contes Guillaumes de Haynau, mais il estoit

maladieus de gouttes, si ne chevauçoi[t] mies à

sen aise. Toutes fois, i[l] l'honnoura et festia grandement,

le terme que elle sejourna à Valenciennes, environ

trois sepmainnes. 10

Entroes, elle fist apparillier son oirre et ses besongnes.

Et li dis messires de Byaumont fist escrire

lettres moult affectueuses as chevaliers et as compagnons

de cui il se fioit le plus, en Haynau, en Hasbaing

et en Braibant; et les prioit, tant qu'il pooit, 15

et cescun sur toutes amistés, qu'il venissent avoech

lui en ceste emprise. Si en y eut grant plenté, de

l'un pays et de l'autre, qui y aloient pour l'amour

de li, et ossi grant plenté qui n'i alèrent mies, comment

qu'il en fuissent priiet. Et meismement li dis 20

messires Jehans en fu durement repris de son frère,

et de aucuns de son propre conseil, pour tant qu'il

leur sambloit que li entrepresure estoit si haute et si

perilleuse, selonch les descors et les grandes haynes

qui adonc estoient entre les haus barons et les communs 25

d'Engleterre, et selonch ce que li Englès sont

communement envieus sour toutes estragnes gens,

quant il sont à leur deseure et meismement en leur

pays, que cescuns avoit paour et doubtance que li

dis messires Jehans ne nulz de ses compagnons peuist 30

jamais revenir. Mais, quoi que on li blasmast ne

desconsillast, li gentilz chevaliers ne s'en volt onques

relaiier. Ains, dist que il n'avoit que une mort à

souffrir, qui estoit en le volenté de Nostre Signeur;

mais il avoit prommis à celle gentilz dame de lui

conduire jusques en son royaume; si ne l'en fauroit

pour morir. Et ossi chier avoit il à prendre le mort 5

avoecques celle noble dame, qui ensi estoit dechacie,

se morir y devoit, que autre part. Car tout chevalier

doient aidier à leur loyal pooir toutes dames et pucelles

à leur besoing, especialment quant il en sont

requis. 10

§ 11. Ensi se parti la royne d'Engleterre de le ville

de Valenciènes, quant elle et ses gens furent apparilliet

de che qu'il leur falloit; et prist congiet au gentil

conte Guillaume de Haynau et ma dame Jehane

la contesse, sa femme, et les remercia grandement, 15

humlement et doucement de le bonne, lie cière et

de la belle recueilloite que il li avoient fait. Si se

mist à voie sus le segureté et conduit del gentil chevalier,

le dit monsigneur de Byaumont. Si fisent tant

par leurs journées que il vinrent à Dourdresk, en 20

Hollandes. Là endroit se pourveirent de naves et de

vaissiaus grans et petis, ensi qu'il les peurent trouver,

et misent dedens leurs chevaus, leurs harnas et

leurs pourveances. Et quant il eurent par avis vent

bon pour eulz, il se commandèrent en le garde de 25

Nostre Signeur, et entrèrent en leurs vaissiaus, et

desancrèrent et se misent en mer. Et n'estoient non

plus de trois cens armeures de fier.

Or, considerés le hardie et haute emprise que li

sires de Byaumont faisoit, que de aler conquerre et 30

entrer en un royaume par force où il ne [cognissoit] [7]

nullui, et ne savoit qu'il y trouveroit, mais il

le faisoit de si grant corage et avoit tel esperance en

Dieu, qu'il li estoit avis que bien furniroit et à sen

honneur le voiage. Si estoit il adonc ou commencement

de son venir, et en le droite fleur de se jonèce; 5

si l'entreprendoit plus volentiers et plus hardiement.

Or vous nommerai aucuns des chevaliers de Haynau

qui alèrent avoecques lui, et à se priière, en ce

voiage: premierement, messires Henris d'Antoing, 10

messires Robers de Bailluel, qui puis fu sires de

Fontainnes, messires Fastrés dou Rues, messires Mikieus

de Ligne, messires Sausses de Boussoit, messires

Perchevaus de Semeries, messires Sanses de

Biauriu, li sires de Wargni, li sires de Potelles, 15

li sires de Montegni, li sires de Gommegnies, li sires

d'Aubrecicourt, et aucun aultre baceler, qui se voloient

enventurer avoech le dit chevalier et leurs

corps avancier. Si y eut aucuns Braibençons et Hesbegnons,

mès ce ne fu pas gramment. 20

Si singlèrent par mer. Et avoient entendu et avisé

qu'il prenderoient terre à un port où il avoient entente

d'arester, mais il ne peurent. Car uns grans

tourmens les prist en mer, qui les mist hors de leur

chemin, qu'il ne sceurent dedens deus jours là où il 25

estoient. De quoi Di[e]x leur fist grant grasce, et leur

envoia belle aventure. Car, se il fuissent embatu à

ce port que il avoient chuesi ou auques priès, il estoient

perdu davantage, et escheu ens ès mains de

leurs ennemis, qui bien savoient leur venue et les 30

attendoient là endroit, pour yaus mettre tous à mort

et le jone roy et la royne ossi; mais Di[e]x ne le volt

mies adonques consentir. Si les fist, ensi que par

droit miracle, destourner, ensi que vous avés oy.

Or avint que, au chief des deus jours, cilz tourmens 5

cessa, et veirent li maronnier terre en Engleterre.

Si se traisent celle part moult joiant, et prisent

terre sus le sablon et sus le rivage de le mer,

sans havene et sans droit port. Si demorèrent sus cel

sablon par trois jours, à petit de pourveances de 10

vivres, en descargant leurs chevaus et leurs harnas;

et si ne savoient en quel endroit d'Engleterre il estoient

arrivet, ou pooir d'amis ou d'anemis. Au

quatrime jour, il se misent à le voie, à l'aventure de

Dieu, comme cil qui avoient eu toute mesaise de 15

fain et de froit par nuis, avoecques les grandes paours

qu'il avoient ewes et avoient encores. Si chevaucièrent

tant amont et aval qu'il trouvèrent aucuns petis

hamelés, et puis apriès si trouvèrent une grande abbeye

de noirs monnes, que on claimme Saint Aymon. 20

Si se herbergièrent et rafreschirent en ceste

abbeye par trois jours. Et fisent penser de leurs

chevaus bien et fort, car il en pensoient temprement

avoir à faire.

§ 12. Nouvelles s'espandirent par le pays tant que 25

elles parvinrent à ceulz par qui seureté et mandement

la ditte dame estoit rapassée. Si se apparillièrent, dou

plus tost qu'il peurent, de venir vers li et vers son

fil qui il voloient avoir à signeur. Et li premiers qui

vint encontre lui, et qui plus grant confort donna à 30

chiaus qui estoient venu avoecques lui, che fu li

contes Henris de Lancastre au Tors Col, qui fu frères

au conte Thumas de Lancastre qui fu decolés, si com

vous avés oy par dessus, et fu pères au duch de Lancastre

qui fu si bons chevaliers et si recommendés,

si com vous porés oïr en ceste hystore, ains que vous 5

venés à le conclusion. Chilz contes Henris de Lancastre

dessus dis vint à grant compagnie de gens

d'armes. Apriès, tant d'uns et d'autres vinrent contes,

barons, chevaliers et escuiers, à tout gens d'armes,

qu'il leur sambla bien qu'il fuissent hors de 10

tous perilz. Et tous les jours croissoient gens d'armes,

ensi qu'il aloient avant.

Si eurent conseil entre yaus ma dame la royne, et

li baron, chevalier et escuier, qui venu estoient encontre

li, que il iroient droit à Bristo, à tout leur 15

pooir, là où li rois se tenoit adonc et li Despensier,

qui estoit bonne ville, grosse et rice et fortement

fremée, seans sus un bon port de mer. Et si y a un

chastiel trop durement fort, seant sus mer, si ques li

mers flote tout au tour. Là endroit se tenoit li rois, 20

messires Hues li Despensiers, li pères, qui estoit

priès en l'eage de quatre vins et dis ans, messires

Hues, li filz, li mestres consillières le roy, qui tous

les mauvais consaulz et mauvais fais li enhortoit, li

contes d'Arondiel, qui avoit à femme la fille monsigneur 25

Huon le Jone, et ossi pluiseur chevalier et escuier,

qui repairoient entours le roy et entours le

court, ensi que gens d'estat repairent volentiers entours

leurs signeurs. Si se misent ma dame la royne

et toute sa compagnie, messires Jehans de Haynau, 30

chil conte et chil baron d'Engleterre et leurs routes,

au dit chemin, pour aler celle part. Et par toutes les

villes là où il entroient, on leur faisoit feste et honneur.

Et toutdis leur venoient gens, à destre et à senestre,

de tous costés. Et tant fisent par leurs journées

qu'il parvinrent devant le ville de Bristo. Si le

assegièrent à droit siège fait. 5

§ 13. Li rois et messires Hues li Despensiers li filz se

tenoient ou chastiel. Li vielles messires Hues li pères

et li contes d'Arondiel se tenoient en le ville de

Bristo, et pluiseur aultre qui estoient de leur acord.

Quant cil aultre et cil de le ville veirent le pooir le 10

dame si grant et si enforciet, et priès que toute Engleterre

estoit de leur acord, et veoient le peril et le

damage si apparant, il eurent conseil qu'il se renderoient

et le ville avoech, salve leurs vies, leurs membres

et lor avoir. Si envoiièrent trettier et parlementer 15

devers la royne et son conseil, qui ne s'i veurent

mies acorder ensi, se la dessus ditte ne pooit faire

dou dit monsigneur Huon et dou conte d'Arondiel

sa volenté, car pour yaus destruire estoit elle là

venue.

20

Quant li homme de le ville de Bristo veirent que

autrement il ne pooient venir à pais ne sauver leurs

biens ne leurs vies, au destroit il s'i acordèrent et

ouvrirent les portes, si ques ma dame la royne,

messires Jehans de Haynau et tout li baron, chevalier 25

et escuier entrèrent ens, et prisent leurs hosteulz

dedens la ville de Bristo. Et cil qui ne s'i peurent

logier, se herbergièrent dehors. Là fu pris li dis messires

Hues li pères, et li contes d'Arondiel, et amené

par devant le royne, pour faire d'yaus se pure volenté. 30

Et ossi li furent amené li sien aultre jone enfant,

Jehans ses filz et ses deus fillètes, qui furent là

trouvées en le garde monsigneur Huon. De quoi la

dame eut grant joie, quant elle vei ses enfans que

veus n'avoit de grant tamps, et ossi eurent tout cil

qui point n'amoient les Despensiers. Et s'il avoient 5

grant joie entre yaus, selonc ce pooient avoir grant

duel li rois et messires li Despensiers li filz, qui estoient

en ce fort chastiel enclos, et qui veoient leur

meschief si grant, qui leur couroit seure si apparamment.

Et veoient tout le pays tourner avoecques le 10

royne et avoecques son ainnet fil, et dreciet et esmeut

encontre yaus. Dont, se il eurent dolour et

paour et assés à penser, ce ne fait point à demander.

§ 14. Quant la royne et tout li baron et li aultre

furent herbergiet à leur aise, il assegièrent le chastiel, 15

au plus priès qu'il peurent. Et puis fist la royne ramener

monsigneur Huon le Despensier le vielle et le

conte d'Arondiel devant son ainsnet fil, et devant

tous les barons qui là estoient, et leur dist que elle

et ses filz leur feroient droit et loy et bon jugement, 20

selonch leurs fais et leurs œuvres. Adonc respondi

messires Hues et dist: «Ha! dame, Diex nous voelle

donner bon juge et bon jugement; et se nous ne le

poons avoir en ce siècle, si le nous doinst en l'autre!»

Adonc se leva messires Thumas Wage, bons 25

chevaliers, sages et courtois, qui estoit mareschaus

de l'ost, et leur racompta tous leurs fais par escript,

et tourna en droit sus un viel chevalier qui là estoit,

afin qu'il raportast sus se feauté que à faire avoit de

telz personnes, par jugement, et de telz fais. Li chevaliers 30

se consilla as autres barons et chevaliers, et

raporta par plainne sieute que il avoient bien mort

desservie, par pluiseurs horribles fais qu'il avoient là

endroit oys racompter, et les tenoient pour vrais et

tous clers. Et avoient desservi, par le diversité de

leurs fais, à estre justiciés en trois manières, c'est à 5

savoir, premiers traynés, et puis decolés, apriès pendus

à un gibet. Tout en tel manière qu'il furent jugiet,

furent il tantost justiciet par devant le chastiel

de Bristo, veant le roy, et veant le dit monsigneur

Huon le fil, et tous ceulz de laiens qui grant despit 10

en eurent. Et puet çascuns savoir que il estoient à

grant meschief de cuer. Ceste justice fu faite l'an de

grasce mil trois cens vingt et six, le jour saint Denis,

en octembre.

§ 15. Apriès ce que ceste justice fu faite, si com 15

vous avés oy, li rois et messires Hues li Despensiers, qui

se veoient assegiet à tèle angousse et à tel meschief,

et ne savoient nul confort qui leur peuist là endroit

de nulle part venir, se misent à une matinée, entre

yaus deus, à peu de mesnie, en un petit batiel, en 20

mer, par derrière le chastiel, pour aler ou royaume

de Galles, s'il peuissent, comme cil qui volentiers se

fuissent sauvé. Mais Diex ne le volt mies souffrir,

car leurs pechiés les encombra. Si lor avint grant

merveille et grant miracle, car il furent onze jours 25

tous plains en ce batelet, et s'efforçoient de nagier

tant qu'il pooient, mais il ne pooient si lonch nagier

que tous les jours li vens, qui leur estoit contraires

par le volenté de Dieu, les ramenoit çascun jour,

une fois ou deus, à mains de le quarte partie d'une 30

liewe priès dou dit chastiel dont il estoient parti; si

ques tous les jours les veoient bien cil de l'ost le

royne.

Au daarrain, avint que messires Henris de Byaumont,

filz au visconte de Byaumont en Engleterre,

entra en une barge, et ossi avoec lui aucuns compagnons, 5

et se fist nagier devers ceulz, et nagièrent

tant et si fort que onques li maronnier le roy ne

peurent tant fuir devant yaus que finablement il ne

fuissent rataint, et pris à tout leur batiel, et ramenet

en le ville de Bristo, et livrés à ma dame la royne et 10

à son fil comme prisonniers, qui moult en eurent

grant [joye] [8], et ossi eurent tout li aultre, et à bonne

cause, car il avoient acomplit et achievet leur desir,

à l'ayde de Dieu, tout à leur plaisir.

§ 16. Ensi reconquist la ditte royne tout le royaume 15

d'Engleterre pour son ainsné fil, sour le confort et

conduit de monsigneur Jehan de Haynau et de se

compagnie. Par quoi ilz et tout si compagnon, qui

en ce voiage furent avoech lui, furent tous tenus

pour preus, par le raison de le haute emprise que 20

fait avoient. Car il ne furent tout comptet, quant il

entrèrent en mer à Dourdresch, si com vous avés oy,

que trois cens armeures de fier, qui fisent si hardie

entrepresure, pour l'amour de le ditte royne, comme

d'entrer en naves et passer mer à si peu de gens, 25

pour conquerre tel royaume comme est Engleterre,

maugré le propre roy et tous ses aidans.

§ 17. Ensi com vous avés oy, fu celle haute et hardie

emprise achievée; et reconquist ma dame la royne

Ysabiel tout son estat, par le confort et conduit del

gentil chevalier monsigneur Jehan de Haynau et de

ses compagnons, et mist à destruction ses ennemis.

Et fu pris li rois meismes par tèle mescheance et 5

fortune que vous poés entendre. Dont tous li pays

communalment eut grant joie, hors mis aucuns qui

estoient de le faveur le dit monsigneur Huon le Despensier.

Quant li rois et li dis messires Hues li

Despensiers furent amené à Bristo par le dessus dit 10

monsigneur Henri de Byaumont, li rois fu envoiiés,

par le conseil de tous les barons et les chevaliers,

ens ou fort chastiel de Bercler, seant sus le grosse

rivière de Saverne, et recommendés au signeur dou

dit chastiel de Bercler que il en fesist bonne garde; 15

et il dist que ossi feroit il; et fu ordonné à lui servir

et garder bien et honnestement, et gens d'estat

entours lui, qui bien savoient que on en devoit faire,

mais point ne le devoient laissier partir dou pourpris.

Ensi fu il enjoint et commandé. Et li dis messires 20

Hues fu tantost livrés à monsigneur Thumas Wage, mareschal de l'host.

Apriès çou, se partirent la royne et toute son host

pour venir droit à Londres, qui est li chiés d'Engleterre,

et se misent au chemin. Li dis messires Thumas 25

Wage fist bien et fort loiier monsigneur Huon

le Despensier sour le plus petit magre et chetif cheval

qu'il pot trouver, et li fist faire à viestir un tabar

et afubler par dessus son abit le dit tabar, semet

de telz armeures qu'il soloit porter, et le faisoit ensi 30

mener par derision apriès le route et le conroi le

royne, par toutes les villes où il devoient passer, à

trompes, à trompètes et flahutes, pour lui faire plus

grant despit, tant qu'il vinrent à Harfort, une bonne

cité. Là fu la royne moult reveramment recheue et

à grant solennité, et toute li compagnie ossi. Et tint

là sa feste de le Toussains moult grande et moult 5

bien estoffé[e], pour l'amour de son fil et des signeurs

estragniers qui estoient avoecques lui.

§ 18. Quant li feste fu passée, li dis messires Hues

qui point n'estoit amés, là endroit fu amenés par devant

le royne et tous les barons et chevaliers, qui là 10

estoient assamblet. Là li furent recordet tout si fet

par escript, que onques ne dist riens à l'encontre: si

ques là endroit il fu jugiés, par plainne sieute, de

tous les barons et chevaliers, à mort, et à justicier,

en tel manière com vous orés. Premierement, il fu 15

traynés sour un bahut, à trompes et à trompètes, par

toute la ville de Harfort, de rue en rue. Et puis fu

amenés en une grant place, en le ville, là où tous li

peuples estoit assamblés. Là endroit fu il loiiés haut

sus une eschielle, si ques çascuns, petis et grans, le 20

pooient veoir. Et avoit on fait en le ditte place un

grant feu. Quant il fut ensi loiiés, on li copa tout

premiers le vit et les coulles, par tant qu'il estoit

herites et sodomites, ensi que on disoit meismement

del roy. Et pour ce avoit decaciet li rois la royne 25

ensus de lui et par son enhort. Quant li vis et les

coulles li furent coppées, on les getta ou feu, et furent

arses. Apriès, on li fendi le ventre, et li osta on

tout le coer et le coraille, et le getta on ou feu pour

ardoir, par tant qu'il estoit faulz de coer et traittes, 30

et que, par son traitte conseil et enhort, li rois avoit

honni son royaume et mis à meschief, et avoit fait

decoler les plus grans barons d'Engleterre, par les

quels li royaumes devoit estre soustenus et deffendus.

Et avoech ce il avoit si enhortet le roy qu'il ne pooit

ou ne voloit veoir la royne sa femme, ne son ainsnet 5

fil, qui devoit estre leurs sires; ains les avoit decaciés,

par doubtance de leurs corps, hors dou

royaume. Apriès, quant li dis messires Hues fu ensi

atournés, comme dit est, on li coppa le teste, et fu

envoiie en le chité de Londres; et puis fu il decopés 10

en quatre quartiers. Et furent tantost envoiiet as quatre

milleurs cités d'Engleterre apriès Londres.

§ 19. Apriès ceste justice faite, si com vous avés oy,

la royne et tout li signeur, et grant fuison dou commun

dou pays, se misent au chemin vers Londres, et 15

fisent tant par leurs petites journées qu'il y parvinrent

à grant compagnie. Et issirent communement

tout cil de Londres, grans et petis, encontre le royne

et son ainsnet fil, qui devoit estre leurs drois sires,

et lor fisent grant feste et grant reverense, et à toute 20

leur compagnie ossi. Et donnèrent cil de Londres

grans dons à le ditte royne, et à ceulz là où il leur

sambloit mieus emploiiet.

Quant il furent ensi receu et si grandement festiiet,

si que dit est, et il eurent là sejourné environ 25

quinze jours, li compagnon qui passet estoient avoech

monsigneur Jehan de Haynau, eurent grant talent de

retourner cescuns en se contrée, car il leur sambloit

qu'il avoient bien fait le besongne et acquis grant

honneur, si qu'il avoient. Si prisent congiet à ma 30

dame la royne et as signeurs dou pays. Ma dame la

royne et li signeur leur priièrent assés de demorer

encores un petit de tamps, pour veoir que on vorroit

faire dou roy, qui en prison estoit, ensi que oy

avés; mais il avoient si grant desir de retourner cescuns

en se maison que priière n'i valu riens. Quant 5

la royne et ses consaulz veirent chou, il priièrent de

coste à monsigneur Jehan de Haynau qu'il vosist

encores demorer jusques apriès le Noel, et qu'il detenist

de ses compagnons avoech lui ceulz qu'il en

poroit detenir. Li gentils chevaliers ne volt mies 10

laissier à parfaire sen service, et otria courtoisement

le demorer jusques à le volenté de ma dame le royne.

Si detint de ses compagnons ce qu'il en peut detenir;

mais petit fu, car li aultre ne vorrent nullement

demorer, dont il fu moult courouciés. Toutes fois, 15

quant la royne et ses consaulz veirent que cil compagnon

ne voloient demorer pour nulle priière, il

leur fisent toute l'onneur et le reverense qu'il peurent.

Et leur fist la royne donner grant argent pour

leurs frès et pour leur service, et grans joiaus, et 20

cescun selonch son estat, si grandement que tout

s'en tinrent à bien content. Et avoech ce elle leur

fist rendre l'estimation de leurs chevaus qu'il vorrent

laissier, si haut que cescuns voloit estimer les

siens, sans debat et sans dire ne trop ne peu. Et 25

tout furent paiiet en deniers appareilliés.

Si demora messires Jehans de Haynau, à le priière

de le royne, à petite maisnie et à peu de compagnons,