Œuvres complètes de Mathurin Regnier / accompagnées d'une notice biographique et bibliographique, de variantes, de notes, d'un glossaire et d'un index
Commencement d’vn poëme sacré
COMMENCEMENT D’VN POEME SACRÉ.
I’ay le cœur tout ravy d’vne fureur nouvelle, Or’ qu’en vn S. ouvrage vn S. Démon m’appelle, Qui me donne l’audace & me fait essayer
Vn sujet qui n’a peû ma jeunesse effrayer.
Toy, dont la providence en merveilles profonde,
Planta dessus vn rien les fondemens du monde, Et baillant à chaque estre & corps, & mouvemens, Sans matiere donnas la forme aux Elemens ; Donne forme à ma Verve, inspire mon courage ; A ta gloire, ô Seigneur, i’entreprens cet ouvrage.
Avant que le Soleil eust enfanté les Ans,
Que tout n’estoit qu’vn rien, & que mesme le temps Confus n’estoit distinct en trois diverses faces, Que les Cieux ne tournoyent vn chacun en leurs places, Mais seulement sans temps, sans mesure, & sans lieu, Que seul parfait en soy regnoit l’Esprit de Dieu, Et que dans ce grand Vuide, en Majesté superbe, Estoit l’Estre de l’Estre en la vertu du Verbe ; Dieu qui forma dans soy de tout temps l’Vnivers, Parla ; quand à sa voix vn mélange divers…