Œuvres complètes de Mathurin Regnier / accompagnées d'une notice biographique et bibliographique, de variantes, de notes, d'un glossaire et d'un index
Stances pour la belle Cloris
S C .
Si le bien qui m’importune
Peut changer ma condition,
Le changement de ma fortune
Ne finit pas ma passion.
Mon amour est trop legitime,
Pour se rendre à ce changement,
Et vous quitter seroit vn crime
Digne d’vn cruel chastiment.
Vous avez dessus moy, madame,
Vn pouuoir approuué du temps,
Car les vœux que i’ay dans mon ame
Seruent d’exemple aux plus contents.
Quelque force dont on essaye
D’assubiettir ma volonté,
Ie beniray tousiours la playe
Que ie sens par vostre beauté.
Ie veux que mon amour fidelle
Vous oblige autant à m’aymer
Comme la qualité de belle
Vous faict icy bas estimer.
Mon ame à vos fers asseruie,
Et par amour, & par raison,
Ne peut consentir que ma vie
Sorte iamais de sa prison.
N’adorant ainsi que vos chaisnes,
Ie me plais si fort en ce lien,
Qu’il semble que parmy mes peines
Mon ame gouste quelque bien.
Vos vœux où mon ame se fonde,
Me seront à iamais si chers
Que mes vœux seront en ce monde
Aussi fermes que des rochers.
Ne croyez donc pas que ie laisse
Vostre prison qui me retient,
Car iamais vn effect ne cesse,
Tant que la cause le maintient.