L'illustre corsaire: tragicomedie
Scene II.
ISMENIE .
Allez donc le haster, & l'amenez vous-mesme.
EVANDRE.
Ouy, Madame, j'y cours. Tout va bien jusqu'icy.
ISMENIE .
Mais, Armille, vostre homme a si bien reüssy
Que nos filles enfin, qui se donnent carriere,
Pour mieux le gouverner ont demeuré derriere.
ARMILLE.
Et luy-mesme se plaist à les entretenir:
Les voicy toutesfois, je les entends venir.
SCENE II.
ISMENIE, ARMILLE, FELICE.
ISMENIE à Felice.
Nous verrons à la fin que Felice & Celie
Prendront avec Tenare un grain de sa folie.
FELICE.
Si par trop de plaisir on prend le mal des fous,
Vostre Altesse a raison d'aprehender pour nous,
Qui fort bien à mon gré nous sommes diverties,
Tant de ses questions, & de ses reparties,
Comme de ses recits pleins de naïfveté,
D'amours & de combats qui n'ont jamais esté;
Au reste il a treuvé ma Compagne si belle
Que je croy tout de bon qu'il est amoureux d'elle;