Scene II.

LEPANTE.

Mais si l'on vous contraint, comme c'est l'apparence,

Que deviendra Lepante avec son esperance?

ISMENIE .

Vous estes deffiant & pressant jusqu'au bout.

LEPANTE.

Je le suis en effect, pource que je crains tout.

ISMENIE .

Lepante encore un coup, je vous parle en ces termes;

Les Cieux ne tournent point sur des Poles plus fermes,

Qu'est le dessein que j'ay de ne manquer jamais

A ce que je vous dois, & que je vous promets:

Mais joüez vostre jeu, je voy venir Armille.

LEPANTE.

Laissez-moy travailler: Ma personne en vaut mille,

Et quiconque osera pretendre à vostre amour,

Fust-il un autre Mars, il y perdra le jour;

Mais puisque vous souffrez qu'un autre vous caresse,

Adieu, je vay chercher ma premiere maistresse,

ISMENIE .

Revenez, revenez.

LEPANTE.

Non, je n'en feray rien.

SCENE II.

ARMILLE, qui a entendu ce qu'il a dit.

Sa colere l'emporte.

EVANDRE.

Il l'entend assez bien.

ISMENIE .

Vous nous trouvez brouillez.

ARMILLE.

Madame, il me le semble,

Quand je vous ay quittez vous estiez mieux ensemble;

Et d'où vient, s'il vous plaist, que vous estes si mal?

ISMENIE .

Il s'est imaginé qu'il avoit un rival,

Et depuis ce temps là je l'ay treuvé si rare

Qu'Evandre vous dira qu'il vaut mieux que Tenare,

Pour moy je l'ayme mieux.

EVANDRE.

Il me plaist plus aussi.

ARMILLE.

Si bien que l'un & l'autre ont fort bien reussi,

Vrayment j'en suis bien ayse estant cause en partie

Du plaisant entretien qui vous a divertie.

ISMENIE .

Je le confesse, Armille, & je vous en sçay gré,

Vous ne pouviez me plaire en un plus haut degré:

Mais quitons ce discours, & me dites de grace

Si mon frere & le Roy sont venus de la chasse?