Scene III.

Allons j'en suis contente.

SCENE III.

LYPAS, ERPHORE.

LYPAS.

O Fatale Provence! ô desloyale Cour!

Où j'ay pour ennemis la Fortune & l'Amour,

Dont l'un m'oste une femme & l'autre une Couronne,

Ainsi de tous costez le malheur m'environne,

Ainsi de quelque part que j'observe mon sort,

Je ne voy que sujets de desirer la mort;

Battu, mocqué, trahy par un Prince infidelle

Qui choisit à sa sœur un party digne d'elle:

Lasche sœur qui prefere à l'amour d'un grand Roy,

L'indigne affection d'un Pirate sans foy:

Frere ingrat, au delà de toute ingratitude,

Qui pour tous mes bien-faits me met en servitude,

Qui pour mon alliance & mes tresors offers

Me retient mes vaisseaux, met les miens dans les fers,

M'oste mes Officiers, & permet qu'à ma veüe

Un Bourgeois insolent les mal-traite & les tue;

Enfin qui non content de m'avoir abusé,

M'ameine un faux Lepante, un Prince suposé,

Afin de partager la Sicile & la Corse

Avec cet heritier dont le droit est la force.

ERPHORE .

Sire, quand un malheur ne se peut éviter,

Le souverain remede est de le suporter.

LYPAS.

Quoy, l'ombre de Lepante aura donc un Royaume?

ERPHORE .

Il ne faut plus parler d'ombre, ny de phantosme,

C'est Lepante luy-mesme, & vostre Majesté

Doit croire sur ma foy que c'est la verité;

Elle sçait qu'autrefois je fus en Syracuse

Luy faire de sa part quelque sorte d'excuse

Touchant ses dix vaisseaux de Cartage venus,

Qu'elle avoit dans ses ports si long-temps retenus.

Or il m'a rapporté les choses que nous fismes,

Et m'a fait souvenir de celles que nous dismes.

LYPAS.

Si bien qu'à vous ouïr, Lepante n'est point mort:

ERPHORE .

Non, Sire, & ses subjets qui l'aymerent si fort

Feront armes de tout tant sur mer que sur terre,

Et couperont la gorge à tout vos gens de guerre;

Ce qu'ils entreprendront d'autant plus aisément

Que desja vostre joug leur pese infiniment,

Et qu'ils auront appris la nouvelle oportune

Du bon-heur de leur Prince, & de vostre infortune;

La flote de Lepante à la rade paroist,

Croisssant à mesme temps que la lumiere croist,

De sorte qu'en l'estat qu'il est, & que vous estes,

Il peut jusques chez nous estendre ses conquestes,

C'est pourquoy de bonne heure en cette adversité

Faites une vertu d'une necessité,

Et par un politique & prudent artifice,

D'un acte de contrainte, un acte de justice;

Rendez de bonne grace, ou feignez de lascher

Un Sceptre qu'aussi bien on vous doit arracher;

En matiere d'estat la feinte est necessaire.