Les amours de Faustine
XI Optat Se Inclusum Cum Faustina.
XI
OPTAT SE INCLUSUM CUM FAUSTINA.
O mihi si liceat furtivos jungere amores,
Hic ubi, me miserum, clausa puella mea est,
Mentirique novam mutata veste figuram,
Juppiter ut quondam casta Diana fuit :
Quam bene, virgineo tectus velamine corpus,
Perferrem sancti jura severa loci !
Nulla Deis melius faceret solennia sacra,
Alternas melius conciperetve preces.
Rursus cum tacita peteretur nocte cubile
Et foret optati reddita forma viri,
Haud quisquam melior validam exercere juventam,
Nocturnisque sacris conciliare Deos.
Sic gratis vicibus Vestæ Venerisque sacerdos,
Nocte parum castus, luce pudica forem.