XX Ad Milites Gallos Cum Ad Bellum Neapolitanum Proficiscerentur

AD MILITES GALLOS CUM AD BELLUM

NEAPOLITANUM PROFICISCERENTUR

Quos chara e patria avulsos et dulcibus arvis

Sævus amor belli misit in Hesperiam,

Pergite fœlices, fatisque vocantibus ite,

Quo vos ipsa vocat Gallica Parthenope.

Illic, si quid erit vobis virtutis avitæ,

Et tanget patrii pectora Martis amor,

Tot frustra repetita Ducum infœlicibus armis

Procumbent vestra mœnia capta manu.

Tunc Siculum scelus ulcisci, patriisque sepulchris

Solvere Achillæas inferias dabitur.

Ast ego qui Veneris miles, Martemque perosus

Haud animo tantum concipio facinus,

Solvere tentabo captivæ vincla puellæ,

Quæ mihi longe ipsis charior est oculis.

Hæc repetenda mihi tellus est vindice dextra,

Hoc bellum, hæc virtus, hæc mea Parthenope.

Langue