L'adolescence clémentine ; La suite de l'adolescence clémentine
Chapitre XV
Au Seigneur Theocrenus, lisant à ses Disciples
Plus proffitable est de t'escouter lire,
Que d'Apollo ouyr toucher la lyre,
Où ne se prend plaisir que pour l'Oreille :
Mais en ta Langue ornée, et nonpareille
Chascun y peult plaisir, et fruict eslire.
Ainsi d'autant qu'un Dieu doibt faire, et dire
Mieulx qu'un Mortel, chose où n'ayt que redire,
D'autant il fault estimer ta merveille
Plus proffitable.
Brief, si dormir plus que veiller peult nuyre,
Tu doibz en loz par sus Mercure bruyre,
Car il endort l'Oeil de celluy, qui veille,
Et ton parler les endormis esveille,
Pour quelcque jour à repos les conduire
Plus proffitable.
XV 119