L'adolescence clémentine ; La suite de l'adolescence clémentine
Chapitre XXIV
D'ung qui se plainct de mort, et d'Envie
Depuis quatre ans faulx Rapport vitieux,
Et de la Mort le dard pernicieux
Ont faict sur moy tomber maint grand orage :
Mais l'ung des deux m'a navré en courage
Trop plus que l'autre, et en bien plus de lieux.
Touchant Rapport, en despit de ses jeux
Je vy tousjours riche, sain, et joyeux,
Combien qu'à tort il m'ayt faict grand dommage
Depuis quatre ans.
Mais quand de Mort le remors furieux
S'en vient par fois passer devant mes yeux,
Lors suis contrainct de blasmer son oultrage :
Car luy tout seul m'a plus donné de rage,
Que n'a Envie, et tous les Envieulx,
Depuis quatre ans.
XXIV 128