L'adolescence clémentine ; La suite de l'adolescence clémentine
Chapitre XXXIX
De sa grand Amye
Dedans Paris Ville jolye
Ung jour passant melancolie
Je prins alliance nouvelle
A la plus gaye Damoyselle,
Qui soit d'icy en Italie.
D'honnesteté elle est saisie,
Et croy (selon ma fantaisie)
Qu'il n'en est gueres de plus belle
Dedans Paris.
Je ne la vous nommeray mye,
Si non que c'est ma grand Amye ;
Car l'alliance se feit telle,
Par ung doulx baiser, que j'eus d'elle
Sans penser aulcune infamie,
Dedans Paris.
XXXIX 143
XL
De Trois Alliances
Tant et plus mon cueur se contente
D'alliances, car aultre attente
Ne me sçauroit mieulx assouvrir,
Veu que j'ay (pour honneur suivir)
Pensée, Grand Amye, et Tante.
La Pensée est noble, et prudente :
La grand Amye belle, et gente :
La Tante en bonté veulx pleuvir
Tant et plus.
Et ce Rondeau je luy presente ;
Mais pour conclusion decente,
La premiere je veulx servir :
De l'autre l'amour desservir :
Croire la tierce, est mon entente
Tant et plus.
XL 144