Oeuvres de Champlain
Chapitre VII
[11 février 1630.]
L'ambassadeur de France supplie sa Majesté de la Grande Bretagne qu'il luy
plaise ordonner suivant & conformément à ce qui a esté promis & accordé
par les articles du XXIIIIe avril dernier, au Capitaine Querch & au Sir
Guillaume Alexandre, & telz autres de ses subjectz qui sont ou se
trouverront en la nouvelle France, de s'en retirer & remettre entre les mains
de ceux qu'il plaira au Roy son Maistre d'y envoier & seront porteurs de sa
commission, tous les lieux & places qu'ilz y ont occupez & habitez depuis
ces derniers mouvemens, & particulièrement la forteresse & habitation de
Québec, costes du Cap Breton & Port roial prins & occupez, scavoir la
forteresse de Québec par le Capitaine Querch & les costes du Cap Breton &
Port roial par ledit Sir Guillaume Alexandre Escossois, depuis le XXIIIIe
avril dernier. Et iceux remettre en mesme estat quilz les ont trouvez, sans en
desmolir les fortifications ny bastimens des habitations, ny emporter
aucunes armes, munitions, marchandises ny ustencilles de celles qui y
estoient lors de la prinse, quilz seront tenuz de rendre & restituer avec
toutes les pelletteries quilz ont apportées dudit païs, ensemble la patache
commandée par le Capitaine de Caen, qui a esté amenée en Angleterre,
comme aussy le navire nommé la Marie de St jean de Luz, du port de
soixante dix tonneaux, qui a esté prins par ledit Alexandre au port des
baleines, coste du Cap Breton, & partie des hommes ramenez icy par le
Capitaine Pomere.
(Sur le dos est écrite.)
MEMOIRE Whereby the French Amb. desires his Majesty to give order for
the restitution of all the places taken in Canada by the English and Scotts
during these last troubles: Item of all the goods and ships brought from
thence hether all in manner as it was taken, CANADA.
(State Paper Office, Colonial Séries, vol. V, art. 50.)